Праваабарончая арганізацыя “Міжнародная амністыя” прызнала вязнем сумлення Івана Міхайлава, якога 1 лютага суд Мінскага раёна пакараў арыштам на тры месяцы, абвінаваціўшы ва ўхіленні ад вайсковай службы. Міхайлаў кажа, што служыць у войску яму не дазваляюць рэлігійныя перакананні, і спасылаецца на Канстытуцыю Беларусі, якая гарантуе права на альтэрнатыўную службу. “Міжнародная амністыя” заклікае неадкладна вызваліць Івана Міхайлава.

Іван Міхайлаў прызнаны беларускім судом вінаватым у здзяйсненні крымінальнага злачынства «за ўхіленне ад мерапрыемстваў прызыву на воінскую службу». Праваабаронца Алена Танкачова, каментуючы вырак суда, зазначыла: “Гэта выдатны спосаб выканаць «правілы прыстойнасці», прызначыўшы 3 месяцы арышту: не так шмат, як прасіў пракурор, але і роўна столькі, колькі неабходна, каб апраўдаць трыманне ў ізалятары да суда. Але варта падумаць у першую чаргу пра тое, што маладому чалавеку паставілі на лоб таўро на ўсё жыццё — «вінаваты ў здзяйсненні крымінальнага злачынства». Па яе меркаванню, да адказнасці ў такіх выпадках трэба прыцягваць не юнакоў, які хацелі б прайсці альтэрнатыўную грамадзянскую службу, а службовых асобаў, адказных за юрыдычныя аспекты закону і канстытуцыйны парадак у краіне.