Мастацкі фільм, зняты па кнізе Святланы Алексіевіч, намінаваны на “Оскар”. Як распавёў БелаПАН прадзюсер фільма ў Беларусі, кіраўнік кампаніі Belarus Productions Ілля Кузняцоў, на прэмію амерыканскай Акадэміі кінамастацтва “Оскар” намінаваны фільм “Дзверы” (The Door) ірландскага рэжысёра Хуаніты Уілсан. Кінагісторыя заснаваная на адным з фрагментаў кнігі Святланы Алексіевіч “Чарнобыльская малітва”. Стужка была намінавана ў катэгорыі “Лепшы кароткаметражны гульнявы фільм”.

Першапачаткова здымкі планаваліся ў Беларусі, папярэдняя падрыхтоўка і падбор акцёраў адбываліся ў Мінску. Затым было прынята рашэнне здымаць у адселеным горадзе энергетыкаў Прыпяць, паколькі менавіта там адбываецца дзеянне кнігі. У аснове кароткаметражнага фільма — гісторыя Мікалая Калугіна, які згубіў дачку ў выніку чарнобыльскай трагедыі. Галоўныя ролі ў фільме выканалі беларускія акцёры Ігар Сігаў (Тэатр беларускай драматургіі, Мінск) і Джульета Казакевіч-Герынг (тэатр “Школа сучаснай п’есы”, Масква). Фільм ужо заваяваў шэраг прэстыжных узнагарод на фэстах розных краін. 82-я цырымонія ўручэння прызоў амерыканскай Акадэміі кінамастацтва пройдзе 7 сакавіка ў Лос-Анжэлесе.