Беларуская гімнастка Меліта Станюта заваявала чатыры медалі на першым этапе Кубка свету па мастацкай гімнастыцы, што прайшоў у канадскім Манрэалі. Найбольш паспяхова дзяўчына выступіла ў практыкаванні са скакалкай, дзе заняла першае месца, апярэдзіўшы расіянак Дар’ю Дмітрыеву і Яўгенію Канаеву. У трох іншых практыкаваннях Меліта Станюта стала бронзавай медалісткай — з мячом, абручом і стужкай. У шматбор’і гімнастка заняла 5-е месца.

Заслужаны трэнера Беларусі Святлана Бурдзевіцкая ў адным з інтэрв’ю адзначыла, што Меліта — з’ява ў сусветнай гімнастыцы: “Яшчэ ніхто з беларускіх мастачак не ўрываўся так імгненна на пастамент, ды яшчэ ў такім юным узросце. Меліце толькі 16 год, а яна ўжо выйграе ў 20–25-гадовы гімнастак за кошт свайго таленту”. Раней галоўны трэнер расійскай зборнай Ірына Вінер назвала Станюту «выдатнай маладой гімнасткай», якая паказвае «цікавую і стабільную» праграму. Яна прадказвала Меліце вялікую кар’ерную будучыню. Эксперты адзначаюць артыстызм дзяўчыны, які, відаць, перадаўся ёй у спадчыну ад прабабулі — слыннай беларускай акторкі Стэфаніі Станюты.