№ 5 (276) 3 лютага 2011
Масава-палітычная газета. Выдаецца з сакавіка 2002 г.
/ З беластоцкай зямлі
04-04-2009 / Мікола Канановіч
Кніга Сяргея Чыгрына «З Беластоцкай зямлі» змяшчае 52 нарысы пра выбітных беларусаў, якія паходзяць з Беласточчыны. Выданне пабачыла свет у студзені 2009 года ў Беластоку дзякуючы Праграмнай радзе тыднёвіка «Ніва».
Сяргей Чыгрын яшчэ з савецкіх часоў з’яўляецца аўтарам «Нівы» — газеты беларусаў у Польшчы. Многія нарысы, змешчаныя ў новай кнізе нашага калегі, раней друкаваліся ў тыднёвіку «Ніва». Выглядае лагічным, што Праграмная рада гэтай легендарнай беларускай газеты знайшла сродкі і ажыццявіла выданне саліднага тому свайго сталага аўтара.
«Сяргей Чыгрын, друкуючы на старонках «Нівы» свае нарысы, дорыць нашай гісторыі і культуры невялікі ўрывак штодзённай працы, зробленай на карысць Бацькаўшчыны незвычайнымі асобамі... Аўтар — збіральнік і захавальнік памяці беларускіх прозвішчаў і імён Сямятыцкай, Гайнаўскай, Бельскай, Беластоцкай, Гарадоцкай, Крынкаўскай, Сакольскай, Дуброўскай зямель, — напісаў у прадмове да кнігі «З Беластоцкай зямлі» яе рэдактар Яўген Вапа, а напрыканцы дадаў: — Хочацца верыць, што на працягу найбліжэйшага часу беларускімі навуковымі інстытутамі ў Польшчы і Беларусі будзе распрацавана праграма па падрыхтоўцы бібліяграфічнага слоўніка беларусаў Падляшскай зямлі. Гэта зямля, яе дзеці і нашчадкі вартыя такога выдання».
У салідны том пад каляровай цвёрдай вокладкай увайшлі многія адрэдагаваныя аўтарам нарысы, якія раней змяшчаліся ў кнізе «Беларуская Беласточчына», што выйшла ў свет летась у Беларусі. Дыхтоўнае выданне «З Беластоцкай зямлі» займае 308 старонак і праілюстравана 125 здымкамі. Калі чытаеш кнігу, дзіву даешся, якой усё ж беларуская Беласточчына была багатай на таленавітых людзей. Шмат новых звестак і фактаў чытачы знойдуць пра Дамініка Аніську, Адама Бычкоўскага, Язэпа Варонку, Янку Геніюша, Сяргея Дубінскага, Уладзіслава Казлоўскага, Любоў Разумоўскую, Уладзіміра Тамашчыка, і многіх іншых — тых, хто ўнёс важкі ўклад у гісторыю Беларусі.
Некаторыя героі новай кнігі Сяргея Чыгрына цяпер жывуць у межах сучаснай Беларусі і ўжо паспелі падзякаваць аўтару за прыемны падарунак, які знаёмыя ці сваякі даслалі ім з суседняй Польшчы.
Чытачы ў Беларусі хутка змогуць набыць «З Беластоцкай зямлі» Сяргея Чыгрына ў мінскіх кнігарнях.
.jpg)
Пакінуць новы каментар