№ 5 (276) 3 лютага 2011
Масава-палітычная газета. Выдаецца з сакавіка 2002 г.
/ “Адлуп” ад Алеся Няўвеся, Перазовы паэзіі і жывапісу, “Халоп Яснавяльможнага дэмакрата”
18-03-2009 / -
“Адлуп” ад Алеся Няўвеся
Гэта другі зборнік вершаваных фельетонаў няўрымслівага аўтара-праўдалюба, які становіцца своеасаблівай сатырычный эпапеяй пра ўсемагчымыя чалавечыя і дзяржаўныя дурноты ды недарэчнасці (Смаленск, выдавецтва “Універсум”, 2009). Учэпістае вока фельетаніста занатоўвае цэлую кнігу маральных і духоўных хваробаў сучаснасці. Аўтар паэтычна пратэстуе супраць чыноўніцкага гвалту, крывадушша, службовай хлусні, прыстасавальніцтва, падхалімства. “Запеўкай” да ўласных тэкстаў паслужылі цытаты з незалежнай перыёдыкі (сярод іншых – і “Народнай волі”). Зрэшты, і большасць фельетонаў Алеся Няўвеся напачатку друкавалі незалежныя газеты. Бо ад часоў байкапісца Кандрата Крапівы нашыя службоўцы-чыноўнікі не любяць глядзецца ў сатырычнае люстэрка...
Перазовы паэзіі і жывапісу
“Перазоў / Перезов” – унікальная кніга-білінгва вершаў пра жывапіс і жывапісцаў, пра натхненне і творчасць, прыгажосць і ўзнёсласць (“Кнігазбор”, 2009). Яе суаўтары – беларускія паэты Соф’я Шах ды Ізяслаў Катляроў. А таксама – нашыя вядомыя мастакі, каму і сплятаюцца кніжныя вершаспевы: Г.Вашчанка, Л.Шчамялёў, В.Шаранговіч, У.Басалыга, М.Селяшчук, В.Альшэўскі, У.Стэльмашонак ды інш.
Багата праілюстраванае выданне (рэпрадукцыямі карцін і фотаздымкамі) складаецца з паэтычнага дзвюхкніжжа: “Варажбіты насычанай палітры” (дыпціхі і вянкі санетаў С. Шах) і “Я живопись читаю как стихи” (дзве вершаваныя нізкі паэтычных прысвячэнняў і мастакоўскіх роздумаў І.Катлярова).
“Халоп Яснавяльможнага дэмакрата”
Жанр новага рамана Валерыя Казакова “Халоп Яснавяльможнага дэмакрата” (выдавецтва “Кнігазбор”, 2009) не зусім звычайны. Пісьменнік ахарактарызаваў яго як раман-дур. Гэта алегарычна-метафарычна-фантастычны аповед пра дзівосныя, але пазнавальныя краіны, дзе віруе амаль рэальнае жыццё сучасніка.
...Палова ХХІ стагоддзя, светам кіруе Высокая сямёрка. І няма ні Расіі, ні ЗША. На палітычнай мапе – Сібрусія, Афраюсія, Аб’еўра. І Хахлабульбія, межы якой прайшлі ў дзесятках кіламетраў ад Масквы... Суседнюю дзяржаву ачольвае Пераемнік Шосты...
У гарах тундры адкрываецца містычна-пракаветная Шамбала, якую намагаюцца знішчыць, бо Кадастр Галоўнай Пільнасці – не спіць, бо народу не трэба залішняе мудрагельства, як і родная мова ды кнігі (якія ўжо амаль усе знішчаныя). І на фоне ўсяго гэтага – каханне, яго выпрабаванне і смерць... І – жыццё краіны.
С.П.
.jpg)
Пакінуць новы каментар