№ 5 (276) 3 лютага 2011
Масава-палітычная газета. Выдаецца з сакавіка 2002 г.
/ «Рабінавы хмель» Сяргея Хмары
15-03-2009 / Мікола Канановіч
Не так даўно ў мінскім выдавецтве «Кнігазбор» пабачыла свет кніга выбраных твораў беларускага паэта, палітычнага і грамадскага дзеяча Сяргея Хмары (Сяргея Сіняка) «Рабінавы хмель». Кніга сталася вынікам руплівай працы яе рэдактара, укладальніка, аўтара прадмовы і каментара Сяргея Чыгрына.
Наш калега доўгія гады ліставаўся з Сяргеем Хмарай. Паэт стала жыў у Таронта (Канада) на эміграцыі з пасляваеннага часу, дзе памёр у 1992 годзе. Летам 2008 года дачка Сяргея Хмары Магдалена Сіняк са сваім мужам упершыню наведалі радзіму бацькі — вёску Казлоўшчына Дзятлаўскага раёна. А спыніліся яны, натуральна, у Слоніме ў Сяргея Чыгрына.
У сярэдзіне 20-х гадоў мінулага стагоддзя Сяргей Хмара арганізаваў на Слонімшчыне 32 гурткі Беларускай сялянска-работніцкай грамады. У Слоніме паэт жыў з канца 30-х і ў пачатку 40-х гадоў. Давялося яму тут і ў турме пасядзець пры паляках. Наогул, за сваю беларускую творчую і палітычную дзейнасць пры паляках, пры немцах і пры саветах Сяргей Хмара-Сіняк адседзеў у турмах каля 11 гадоў.
Сяргей Чыгрын расказвае пра лёс і біяграфію Сяргея Хмары ў прадмове да кнігі «Жураўліны шлях паэта». Далей ідуць раздзелы: «Вершы», «Абразкі», «Аб Багох крывіцкіх сказы (З беларускай міфалогіі)», «Згадкі», «Лісты Сяргея Хмары з Таронта» і заканчваецца кніга раздзелам «Каментар», дзе ўкладальнік адсылае чытачоў да крыніц, з якіх браліся творы для друку. Асобным раздзелам можна назваць і фотаматэрыялы кнігі з анатацыямі да іх.
«Рабінавы хмель» — своеасаблівы мастацкі летапіс часу, калі жыў і змагаўся за беларускую справу яе аўтар. Разам з тым вершы, абразкі і згадкі (успаміны) Сяргея Хмары чытаюцца лёгка і з цікавасцю, бо аўтар — таленавіты паэт і літаратар. Да ўсяго, як у кожнага сапраўднага мастака, многія яго творы застаюцца актуальнымі і сёння. Дазволю сабе тут цытату з верша С. Хмары 1936 года «Далакопы»:
Ад рана да ночы капаем.
Пад звоны, пад спевы жалезных рыдлёвак.
Аб будучым думы складаем:
Як звонам матораў надыдуць дні новы...
Капаем,
Ад рана да ночы капаем...
Так і капаем мы тымі ж рыдлёўкамі і цяпер: зямлю, бульбу, дарогі і дарогу да беларускай Беларусі.
...А кніга цікавая і дыхтоўная — у цвёрдай вокладцы ды на добрай паперы. І варта падзякаваць укладальніку, што Сяргей Хмара ўпершыню дайшоў да Беларусі ў найбольш поўным зборы яго твораў. Хаця б накладам у 100 асобнікаў.
.jpg)
Пакінуць новы каментар