Адбылося чарговае пасяджэнне Рады ГА «Саюз беларускіх пісьменнікаў» (СБП), на якой старшыня Алесь Пашкевіч выступіў з дакладам аб арганізацыйна-масавай рабоце аб’яднання.

Была падрабязна асветлена выдавецкая дзейнасць (выданне штомесячнага дадатка «Літаратурная Беларусь» і бюлетэня «Кніганоша», укладанне і навуковая апрацоўка чарговых тамоў Поўнага збора твораў Васіля Быкава, падрыхтоўка і выданне наступных чатырох кніг з заснаванай серыі СБП «Кнігарня пісьменніка», а таксама выданне зборніка паэтычных прысвячэнняў Васілю Быкаву «Пасланец мужнасці», альманаха «Жырандоля-2», юбілейнай кнігі-білінгвы Рыгора Барадуліна «Перакуленае / Опрокинутое» ды іншае, у тым ліку і міжнародныя праекты: анталогія беларускай паэзіі па-літоўску «Святло ў вокнах», беларуска-літоўска-польска-ўкраінскія альманахі, расійскія і ўкраінскія часопісы).

Аналізавалася ў дакладзе старшыні СБП і арганізацыйна-масавая праца: найбольшая ўвага надзялялася папулярызацыі сучаснай беларускай літаратуры. Як заснавальнік і партнёр грамадскай кампаніі «Будзьма беларусамі!» СБП за мінулыя паўтары гады арганізаваў і правёў 824 выступы літаратараў перад чытачамі Мінска і ўсіх рэгіёнаў Беларусі. Кіраўніцтвам арганізацыі праве­дзеныя два агульнарэспубліканскія конкурсы і семінары па дзіцячай літаратуры і крытыцы. СБП мае магчымасць вылучаць сваім членам у год 4 бясплатныя стыпендыі на творчы адпачынак на выспу Готланд (Швецыя), а таксама на ільготных умовах — у Дамы творчасці на Чорным моры.

Былі адзначаны станоўчыя зрухі і ў галіне міжнароднага супрацоўніцтва: СБП з’яўляецца членам пяці міжнародных літарганізацый, сярод якіх — найбольш уплывовыя Еўрапейская Пісьменніцкая Рада (ЕПР) і Балтыйская Пісьменніцкая Асацыяцыя (БПА). Дэлегаты СБП бралі ўдзел у важнейшых сусветных пісьменніцкіх форумах: сусветным пісьменніцкім з’ездзе «Волтык», у трох генеральных асамблеях ЕПР і двух кангрэсах БПА, а таксама шэрагу міжнародных літаратурных імпрэзах.

Распавёў старшыня СБП і пра фінансавыя магчымасці (падрабязна засяродзіўшыся на паклёпніцкіх, правакацыйных і хлуслівых чутках, якія распаўсюджваюць апошнім часам некаторыя літаратары), і пра бягучыя справы, пакрытыкаваўшы працу секцыі прозы і публіцыстыкі, а таксама прыёмнай камісіі.

«Па сутнасці, Саюз беларускіх пісьменнікаў аднавіў-вярнуў (хоць і ў меншым, натуральна, маштабе) тое, што растрачваў з 1996 года, — падрахаваў

А. Пашкевіч. — Саюз мае свой перыядычны друкаваны орган і інтэрнэт-сайт, памяшканне, кніжную серыю (грамадскае выдавецтва), своеасаблівае Бюро прапаганды (кампанія «Будзьма беларусамі!»), штогадовыя стыпендыі, літаратурныя конкурсы і семінары».

Рада адзінагалосна выказала давер кіраўніцтву Саюза беларускіх пісьменнікаў пад ачолам Алеся Пашкевіча, зацвердзіла спіс асабовага складу грамадскага аб’яднання, а таксама прыняла ў шэрагі старэйшай творчай арганізацыі Беларусі двух новых сяброў: беларускамоўнага паэта, празаіка, перакладчыка і барда Віктара Шалкевіча (Гродна) ды расійскамоўнага паэта, публіцыста і выдаўца Мікалая Аляксандрава (Брэст).