№ 5 (276) 3 лютага 2011
Масава-палітычная газета. Выдаецца з сакавіка 2002 г.
/ Руплівы Кніганоша
25-06-2010 / -
Пад такой назвай — «Кніганоша» — пачаў выходзіць інфармацыйны бюлетэнь, заснаваны ГА «Саюз беларускіх пісьменнікаў» і МГА «ЗБС «Бацькаўшчына». Выйшлі тры яго нумары, кожны — на васьмі палосах.
У кожным нумары ў рубрыцы «Аўтограф» падаецца бліц-інтэрв’ю з вядомымі беларускімі творцамі. Астатнія старонкі прысвечаныя папулярызацыі новых беларускіх выданняў. Так, №3 бюлетэню разам з вокладкамі падае творчыя анатацыі на 35 «свежавыдадзеных» кніг. Сярод іх у галіне «Мастацкая літаратура» — наступныя тамы «Беларускага кнігазбора»: «Выбранае» Генадзя Бураўкіна, «Выбранае» Максіма Гарэцкага, «Выбранае» Рыгора Кобеца, «Выбранае» Уладзіміра Някляева, а таксама «На далонях вечнасці» Анатоля Бутэвіча і Уладзіміра Ягоўдзіка, раман «Замак пабудаваны з крапівы» Зміцера Вішнёва, «Несыметрычныя сны» Андрэя Хадановіча, у раздзеле «Навука/Публіцыстыка/Даведнікі»: збор твораў Арсена Ліса, «Гісторыя Беларусі ад сярэдзіны XVIII ст. да пачатку ХХІ ст.» Алега Латышонка і Яўгена Мірановіча, «Кароткая граматыка славацкай мовы» (выдавецтва «Радыёла-плюс») і іншыя. Змяшчаюцца ў «Кніганошы» і некалькі кароткіх рэцэнзій ды аглядаў (рубрыкі «Погляд», «З першых вуснаў», «Дзеяслоў» раіць»), а таксама падаюцца і кантакты беларускіх незалежных выдавецтваў, у якіх можна замовіць неабходную кнігу: «Бібліятэка Саюза беларускіх пісьменнікаў «Кнігарня пісьменніка» і «Бібліятэчка «Дзеяслова», «Гарадзенская бібліятэка», ІП «Логвінаў», ПУП «Кнігазбор», ПУП «Радыёла-плюс», СТАА «Медысонт», выдавецтва «Галіяфы», выдавецтва «Лімарыюс», ІП «Зміцер Колас», «Кнігарня «Наша ніва» ды іншыя.
Рэдагуе інфармацыйны бюлетэнь «Кніганоша» Алесь Сачанка. У папяровай версіі выданне бясплатна рассылаецца ў бібліятэкі Беларусі (299 асобнікаў), а таксама распаўсюджваецца па краіне і за яе межамі ў электроннай версіі. Электронны адрас «Кніганошы» — knihanosza@gmail.com.
.jpg)
Пакінуць новы каментар