Нарэшце, даспелі. Аляксандр Лукашэнка, выступаючы 29 кастрычніка перад выкладчыкамі Таджыкскага тэхнічнага ўніверсітэта імя акадэміка М.С. Асімі, заявіў, што настаў час “расчысціць дарогу для поўнафарматнага ўзаемадзеяння” з Захадам.

Канешне, не без агаворак. “Двайныя стандарты, якія прымяняюць еўрапейцы, спробы націску і ўжыванне санкцый не стануць канструктыўным элементам палітыкі”, — заявіў ён.

“Упэўнены, даўно надышоў час адмовіцца ад гэтых штучных бар’ераў, замшэлых стэрэатыпаў і расчысціць шлях для поўнафарматнага ўзаемадзеяння, які адпавядае чаканням нашых народаў”, — цытуе беларускага афіцыйнага лідара дзяржаўнае інфармагенцтва БелТА.

Лукашэнка нагадаў, што Еўрасаюз для Беларусі з’яўляецца найважнейшым гандлёвым партнёрам і буйным інвестарам. Тавараабарот з краінамі Еўрасаюза, паводле яго слоў, на 5% перавышае тавараабарот з Расіяй, галоўным палітычным і эканамічным партнёрам Беларусі. “Але вы ведаеце, як паводзіць сябе Еўрасаюз: нейкая дэмакратызацыя (чытай — хаос і развал). Але ні вам, ні нам такая дэмакратызацыя не патрэбныя. Мы павінны працаваць у сваіх інтарэсах, інтарэсах свайго народа”, — сказаў ён.

Кіраўнік краіны завіў, што Беларусь забяспечвае бесперабойны транзіт тавараў і энергарэсурсаў у ЕС, ахову межаў, спыняе нелегальную міграцыю. “Так што цікавасць да дыялогу і выбудоўвання нармальных адносін павінна аб’ектыўна прысутнічаць у абодвух бакоў. Пры гэтым мы не стаім з працягнутай рукой, выпрошваючы супрацоўніцтва, — мы яго прапаноўваем”, — заявіў ён.

Гэта датычыцца і адносін з ЗША, адзначыў ён. “Не мы былі ініцыятарамі цяперашніх складанасцяў у нашым дыялогу. Наадварот, Беларусь заўсёды была адказным партнёрам Злучаных Штатаў у барацьбе з тэрарызмам, наркатрафікам, адмываннем грошай і гандлем людзьмі”, — сказаў Лукашэнка. Паводле яго слоў, Беларусь таксама аказвае спрыянне Вашынгтону ў вырашэнні афганскай праблемы.

Наконт Еўропы — усё зразумела. Сапраўды, Беларусь спыняе нелегальную міграцыю, наркатрафік, гандаль людзьмі. Пра “бесперабойны транзіт тавараў і энергарэсурсаў” можна было б прамаўчаць. Усё ж такі бесперабойны транзіт энергарэсурсаў мы не забяспечвалі, і “зачынялі газавы кранік” у час нафтагазавых войнаў з Расіяй неаднаразова. І Еўропа не заставалася ўбаку. Дастаткова толькі ўзгадаць, колькі грошай па лініі Еўропы было патрачана на абсталяванне беларускай мяжы.

А вось ЗША — ну гэта вельмі дзіўна. З Еўропай разабраліся — ад Партугаліі да Беларусі прыкладна (лінейкай памераць на мапе можна!) да Уральскіх гор, якія аддзяляюць Еўропу ад Азіі (геаграфічна) — прыкладна аднолькавая адлегласць. Але тое, што Беларусь “таксама аказвае спрыянне Вашынгтону ў вырашэнні афганскай праблемы”… Выбачайце. Дзе Вашынгтон, дзе Мінск, і дзе Кабул? Як мы можам аказваць гэтую падтрымку і спрыянне? Тым больш, што Лукашэнка сам неаднаразова заяўляў — нашы вайскоўцы за межамі Беларусі ваяваць не будуць.

Гэта, дарэчы, ён у чарговы раз падкрэсліў 31 кастрычніка на цырымоніі ўручэння дзяржаўных узнагарод. “У краіне не дапусцілі разгулу злачыннасці і хаосу. Беларусь застаецца мірнай і згуртаванай краінай”, — заявіў Лукашэнка.

То бок, мы мірныя людзі. Але ўдзель­нічаем у вырашэнні ўзброенага канфлікту ў Афганістане?

Дарэчы, шмат якія аглядальнікі заўважылі, што Лукашэнка ўзнагародзіў следчых, якія хутка выкрылі “тэрарыстаў”. Лукашэнка ўручыў узнагароды вайскоўцам і супрацоўнікам праваахоўных органаў. “Мы ўзнагароджваем людзей, якія мелі непасрэднае дачыненне да раскрыцця тэракта ў мінскім метро. І тых, хто ахоўвае парадак нашай радзімы кожны дзень”, — сказаў ён.

Між тым, прысуд па справе аб тэрактах у мінскім метро 11 красавіка 2011 года яшчэ не вынесены. І так званыя “тэрарысты” — Зміцер Канавалаў і Уладзіслаў Кавалеў, вінаватымі дагэтуль не з’яўляюцца. Іх віну можа вызначыць толькі суд. А ўзнагароджваць за “раскрыццё злачынства” яшчэ да вынясення прысуду… А раптам суд прызнае іх невінаватымі?

Па меркаванні юрыстаў, такім чынам Лукашэнка наўпрост умешваецца ў хаду следства. “Скажыце, які суддзя, хай нават ён і цэлы намеснік старшыні Вярхоўнага суда, рызыкне не тое каб спрачацца, а проста кі­нуць цень на аўтарытэт Аляксандра Рыгоравіча Лукашэнкі? Правільна. Ніякі. Такіх суддзяў у РБ не водзіцца”, — пракаментаваў рашэнне Лукашэнкі аб узнагародзе журналіст Андрэй Пачобут, які таксама неаднойчы сутыкаўся з беларускай судовай сістэмай. Ён ведае, пра што кажа.

Але ж не ўсё ў нас такое… праблемнае. 1 лістапада ў чацвёртым туры групавога этапу Лігі чэмпіёнаў УЕФА барысаўскі БАТЭ згуляў унічыю 1:1 з італьянскім “Міланам”. Сустрэча прайшла 1 лістапада на мінскім стадыёне “Дынама” пры аншлагу.

Збянтэжылі нашы вядомы еўрапейскі клуб. “Мілан” шмат забівае, але не гэтым разам, заявіў галоўны трэнер “Мілана” Масіміліяна Алегры на прэс-канферэнцыі ў Мінску пасля матча з БАТЭ.

“Мы павінны былі вырашыць зыход матча ў першым тайме, у нас былі ўсе шансы перамагчы, але, на жаль, гэтага не адбылося. У другім тайме мы атрымалі гол з пенальці, і пасля гэтага наша жыццё ўскладнілася. Калі лік 1:1, перамагчы значна складаней”, — сказаў Алегры.

Ён назваў БАТЭ вельмі арганізаванай камандай з вялікай колькасцю таленавітых гульцоў.

А трэнер БАТЭ Віктар Ганчарэнка, здаецца, не хавае радасці. У матчы чацвёртага тура групавога этапу Лігі чэмпіёнаў УЕФА з “Міланам” БАТЭ гуляў дзёрзка, агрэсіўна, не думаючы пра тое, яму супрацьстаіць топ-клуб — казаў Ганчарэнка. “Першы гол у вароты топ-клуба... Гэты вынік выпакутаваны, гульцы ўсё пакінулі сёння на полі”, — сказаў Ганчарэнка.

23 лістапада БАТЭ прыме “Вікторыю”, а “Мілан” — “Барселону”. Апошнія дзве каманды датэрмінова выйшлі ў 1/8 фіналу ЛЧ, а першыя дзве будуць аспрэчваць трэцяе месца, якое дае права выступіць у 1/16 фіналу Лігі Еўропы. Перамога над чэхамі дазволіць БАТЭ стаць недасягальным.