№ 5 (276) 3 лютага 2011
Масава-палітычная газета. Выдаецца з сакавіка 2002 г.
/ Таццяна Шапуцька ў ЕГУ
05-02-2010 / -
Таццяну Шапуцьку, адлічаную з юрфаку БДУ, 2 лютага прынялі на другі курс Еўрапейскага гуманітарнага універсітэта ў Вільні па спецыяльнасці “паліталогія”.
Сумоўе ўзначальваў асабіста рэктар ЕГУ прафесар Анатоль Міхайлаў. “У мяне было дзве сустрэчы. Першая — са спадаром Міхайлавым, які распытваў пра сістэму адукацыі ў Беларусі, пра маё бачанне далейшага развіцца дэмакратычнага руху і беларускіх навучальных установаў. Другая сустрэча была з дэканам дэпартамента паліталагічных навук і з усімі прарэктарамі. Да маёй нечаканасці, гэтая сустрэча праходзіла цалкам па-англійску, бо адна з прарэктарак, адказная за міжнародныя сувязі, была амерыканкай. Мне задавалі розныя пытанні — ад таго, што я праходзіла ва універсітэце да тэхнічных момантаў — у прыватнасці, ці маю я доступ да інтэрнэту. Урэшце мне сказалі, што я прынятая на вучобу. Літаральна праз два тыдні ва універсітэце пачынаецца сесія, на якой я павінна прысутнічаць”, — распавяла Таццяна.
Нагадаем, Таццяну Шапуцьку, намесніцу старшыні Маладога Фронту, адлічылі з юрфака БДУ ў пачатку снежня пасля яе ўдзелу ў Форуме грамадзянскай супольнасці “Усходняга Партнёрства” ў Бруселі. Фармальна — за тое, што парушыла правілы, не папрасіла дазволу на выезд за мяжу.
Таццяна падала скаргу спачатку рэктару БДУ Сяргею Абламейку, затым міністру адукацыі Аляксандру Радзькову. Абодва адказалі аднолькава: загад пра выключэнне не будзе скасаваны, усе зроблена законна. Зараз Таццяна рыхтуе скаргу ў суд на Белдзяржуніверсітэт, бо пратэстуе супраць адлічэння. Варта адзначыць, што дзяўчына вучылася вельмі добра (сярэдні бал 8,5), і апроч трох дзён удзелу ў Форуме іншых пропускаў не мела.
Паводле “Еўрарадыё”
.jpg)
Пакінуць новы каментар